يتعلموا... يتعلموا

Updated: Oct 23, 2018

يتعلموا ويقلدوا، دة مش بعيد يتعقدوا شوف هما فين وحبيبي فين، مشافوش كدة ولا يحلموا


هو يعني أيه حب؟

حب يعني حد بيتعلق بحد و بيكن مشاعر خاصة تجاهه غير باقي الناس صح؟ و على حسب درجة الحب بتكون درجة الأفعال اللي الشخص بيعملها علشان يكون مع الشخص اللي بيحبه. و ده الوضع مع عمرو دياب و دينا الشربيني، اللي أنا فعلاً بتمنى من كل قلبي ليهم كل النجاح و التوفيق. حب يعني معظم أغاني الألبوم الأخير تحسها رسايل من عمرو لدينا.

هبتدي كلامي بأني أستعير مطلع من أغنية عمرو السنة دي (يتعلموا)، بس بدل ما هقول من الرقة دي هقول من الحب دا. الحقيقة بيتهيألي دي أول مرة عمرو دياب يحب بجد من كل قلبه و بكل مشاعره كدا. كان معروف دايماً إن عمرو دياب منطوي جداً على نفسه و مش شخص عام، بس بمجرد ظهور دينا الشربيني في حياة عمرو و هو تحول لشخص مرح، شخص بيظهر كتير و حفلات كتير و أغاني شخصية كتير، لدرجة أنه يعمل أغنية مخصوصة ليها (برج الحوت). مستغرب قوي تعليقات الناس الغيورة انه طلع دينا معاه على المسرح و قدمها، أولاً دينا الشربيني شخص مرح جداً و على الصعيد الفني هي ممثلة من الأفضل في جيلها. ثانياً بقى و دا الأهم، اللي متابع هيعرف إن عمرو فعلاً شكله مبسوط، فعلاً عايش حالة حب هو معشهاش قبل كدا. مش فاهم بقى سبب هجوم الناس غير المبرر عليها و موجة التنمر اللي كانت بتتعرضلها في الجونة، الحالة اللي خلته يسافر علشان يدعمها. لو دا مش حب بجد يبقى مفيش حاجة إسمها حب، و لو دا حب حقيقي يبقى مش من حق أي شخص انه يعترض على دا.

انا ليكي يا اللي انتي صوتك عذب و ملائكي، همسات صوتك ضحكتك تروي عطش روحي، نظرة عيونك ملهمة و إنتي دواء جروحي. والله لحبك موت

عمرو إتغير في الفترة اللي فاتت من وقت ألبوم معدي الناس، من وقت حبه لدينا و دي حاجة أنا مقتنع بيها جداً، من وقت دخول برج الحوت حياته. الطاقة اللي كانت وصلالي منه كانت صادقة جدا و واصلة للقلب. و أمنيتي الوحيدة إن الناس تتعلم من الحب دا، بدل ما ينتقدوا و يتغاظوا، يتعلموا يحبوا بعض كدا، يتعلموا يتغيروا علشان بعض، يدعموا بعض و يفتخروا ببعض كدا…


27 views

©2018 by Helaly Writings