الوزيرة رانيا المشاط - جمهورية مصر العربية



أستكمال لقائمة السيدات العرب اللي من وجهة نظري الشخصية هن صاحبات أثر و بصمة في مجتمعاتهم و المجتمعات المحيطة، معالي الوزيرة رانيا المشاط وزيرة السياحة لجمهورية مصر العربية.

السياحة هي صناعة ٩٨٪ منها قطاع خاص، و دورنا بوزارة السياحة التنسيق بين الوزارات

جميل ان يكون عندك فكر و تكون ناجح، و الأجمل هو انك تعرف تعمل دا و تكون انت شخصياً مثال حي للنجاح دا، و يكون عندك رؤيا حقيقية للمستقبل منغير ما تنسى الحاضر. ببساطة هي دي الوزيرة رانيا المشاط.

مقدمة بسيطة يمكن معروفة لكن لا بد منها عن الوزيرة الأنيقة و الننشيطة رانيا المشاط:

هي من مواليد جمهورية مصر العربية محافظة المنوفية ١٩٧٥

• بكالوريوس في الاقتصاد، الجامعة الأمريكية بالقاهرة عام "1995".

• ماجستير في الاقتصاد، جامعة ميريلاند في كوليج بارك عام"1998".

• دكتوراه في الاقتصاد، جامعة ميريلاند، في كوليج بارك عام "2001"

• دبلوم إدارة الموارد البشرية من الجامعة الأمريكية بالقاهرةعام “2007".

• أستاذ الاقتصاد، المساعد منذ "2008".

• حاصله على شهادة السياسات العامة والإبداع القيادي من جامعة هارفارد عام “2016".

الحقيقة معالي الوزيرة رانيا المشاط قدرت في وقت قصير أنها تلفت انتباه العالم للسياحة في مصر تاني، من خلال نشاطها الواضح و فكرها المتطور اللي هدفه الأرتقاء بقطاع السياحة في مصر. حصلت علي جائزة الريادة في قطاع السياحة من المنظمة الدولية للسلام والسياحة بالتعاون مع منظمة السياحة العالمية. عمر ما التطوير بييجي من الفلوس بس، و عمره ما بييجي من الفكر بس، التطوير و النجاح هو خليط ما بين الفكر و حسن استغلال الموارة، هو النظر خارج الصندوق و الاهتمام بالتفاصيل. العمل المستمر و الاهتمام بكل شيء هو من أهم أسباب نجاح معالي الوزيرة رانيا المشاط في فترة ليست بطويلة.

من فترة كنت موجود في روما و استوقفني قوي اسلوب التعامل اللي كان موجود، خلوني سريعاً أحكي عن زيارتي علشان هي ليها صلة مهمة بمعالي الوزيرة.

قبل ما أسافر كنت عامل بحث على جوجل علشان أعرف هروح فين و أعمل أيه و كدا، و كم الفيديوهات اللي كانت موجودة بتحكي عن تعمل ايه و تروح فين و ازاي كانت رهيبة. لما وصلت لروما كان الناس كلها في منتهى التعاون، كان التعامل كأني شخص مهم جداً و ذو شأن، لمجرد اني ضيف عندهم في البلد. كان لافت انتباهي ان المطاعم و اماكن بيع القهوة و المحلات و حتى الشرطة كلهم عارفين انهم في مدينة سياحية و كلهم بيخدموا علشان السياح يكونوا مبسوطين. لما كنت حابب أصور مبنى أثري و كان في عربية شرطة جارجة الصورة و طلبت منهم يتحركوا علشان اصور المبنى، حصل اللي متخيلتوش و حركوا العربية شوية علشان أصور، لما وريت المرشد اللي معايا في الفاتيكان صورة من النت و قلتله عاوز أصور زيها، قالي بالظبط المكان و أوصله أزاي.

اللي بقوله مرتبط جداً بمعالي الوزيرة، في حديث معاها لقناة صدى البلد من بورصة برلين للسياحة قالت:

الهدف وجود في كل بيت مصري شخص يعمل بمجال السياحة و دا مش بعيد، السياحة على علاقة مباشرة و غير مباشرة بقطاعات كثير
السياحة صادرة خدمية، و يجب الإهتمام بها في الأسرة المصرية

الواقع بيقول، اللي شاف صور و فيديوهات مصر في بورصة برلين ٢٠١٩ هيعرف قد أيه التطوير اللي بيحصل في قطاع السياحة تطوير حقيقي، و اللي بتقوم بيه وزيرة على وعي و ثقافة عالية. كنت دايماً بقول لازم يتبص على السياحة في مصر و على مصر نفسها أنها منتج يجب الترويج له بالطرق الدعائية كأنه منتج خاص، و دا برضه اللي اتقال على لسان معالي الوزيرة:



النهاردة بنحاول نخلق قطاع بيتكلم نفس اللغة و نرتقي بقطاع السياحة



متفائل جداً بشخص معالي الوزيرة رانيا المشاط، و اللي لم أشرف بلقائها شخصياً لكن بتمنى دا و بتمنى اني اقدر احاورها. لكن شرفت بحضور Riseup Summit و اللي معالي الوزيرة كانت ضيفة فيه و أتكلمت كتير و الحقيقي ان يمكن خلفيتها الإقتصادية يمكن هي من أهم عوامل نجاحها، بجانب طموحها و فكرها المتطور. تغير الفكر من ان في ناس معينة بيشتغلوا في الفنادق و الآثار هم واجهة السياحة، لأن الناس كلها مسؤولة عن السياحة.

الأهم غير أننا نعرف الهرم فيه أيه و المعابد، مهم جداً أزاي أتعامل و أكرم الضيف، و أشيل الأذى من الطريق و التبسم في وشه.

#رانيا #المشاط #مصر #جمهورية_مصر_العربية #السياحة #وزارة_السياحة #شهر_المرأة #وزيرة_السياحة

13 views

©2018 by Helaly Writings