رمضان على الابواب



اولا كل سنة و انتم طيبين و رمضان كريم


رمضان على الأبواب و حبيت أشارك معاكم كام حاجة:


١- الناس اللي بتتفرج على مسلسلات في رمضان مش كافرة، بلاش أحكام على الناس


٢- الناس اللي مبتصليش في رمضان ربنا هو اللي بيحكم يتقبل منها الصيام ولا لأ مش أنت، بلاش أحكام على الناس


٣- الناس اللي مكانتش بتصلي و بدأت تصلي في رمضان يا ريت منقعدش نتريق عليهم، محدش عارف النوايا، بلاش أحكام على الناس


٤- البنت اللي بتلبس الطرحة (الحجاب) في رمضان و في غيره بتلبس مكشوف، هي شايفة ان دي طريقة من طرق التقرب لربنا و دا حقها، بلاش أحكام على الناس


٥- البنت اللي مش محجبة و بتلبس مكشوف و بتعمل كل البدع و في رمضان بتبعت أدعية و أذكار، تاني هي مكانتش كافرة و دلوقتي مش شيخة، هي بتقرب باسلوبها لربنا و مش من حق حد يحاسبها، بلاش أحكام على الناس


٦- السادة اللي بيتريقوا على الناس اللي بتروح تصلي في الجامع، سيبوا كل واحد براحته


٧- السادة اللي بياخدوا ولادهم معاهم في التراويح أو القيام، ممكن متفضلوش تقولوا ليهم يسكتوا؟ ملكوش دعوة بالناس اللي بتبصلهم، الرسول نزل من على منبر الخطبة علشان يحضن الحسن و الحسين. المسجد مش عقاب، سيبوهم براحتهم و خلوهم يحبوا المسجد


٨- السادة اللي مقتنعة ان ”تسوية الصف من تمام الصلاة “ و ان ”القدم في القدم و الكتف في الكتف “ دا لا يعني إطلاقاً ان صباع رجلك يبقى فوق صباع رجلي، جنب بعض حضرتك مش فوق بعض


٩- الصلاة الجماعية سرية، يعني مش لازم ابقى بصلي و اللي جنبي يقعد يتمتم بصوت عالي لدرجة تفقدني تركيزي


١٠- التراويح سنة مش فرض، ارجوا لو حد مش بيصليها محدش يقعد يكفره و ينتقد لحد ما يكره الصلاة

رمضان شهر محبة و رحمة، نحاول نتمسك بأبسط سنة عن النبي عليه الصلاة و السلام و هي التبسم


#رمضان_كريم #رمضان #الصلاة #التراويح

4 views

©2018 by Helaly Writings