الحلم مش خيال

Updated: Oct 7, 2018

الحلم مش خيال، الحلم هدف بعيد محتاجين نوصله. الحلم أمل مستنيينه و مؤمنين بيه...

النهاردة كنت زهقان و كعادة أي حد لما بيبقى زهقان بيدور على حاجة تسليه، بالنسبة لي دي بتكون فيديوهات TED و للي ميعرفش دي ايه، منصة TED هي منصة عالمين لنشر الأفكار اللي تستحق الانتشار (Ideas worth spreading).

المتعارف عليه بشكل عام هو ان في كل بلد بيقام عدد من ندوات تبع المنصة دي بس تنظيم محلي بإشراف تبعهم اللي هي اسمها TEDx. و بيطلع متحدثين يتكلموا عن أفكار كتير بالنسبة ليهم مهمة، و بيوروك ليه ليك كمان المفروض تكون مهمة. لكن منصة TED نفسها ليها خصوصية كبر شوية و دا علشان انتشار جمهورها و كمان بسبب عدد الناس اللي تحلم تكون متحدثة فيها كتير جداً فبالتالي احتمالية اختيار شخص من ضمن ملايين الأشخاص طبعاً قليلة. المهم أول حاجة فتح البرنامج عليها كان فيديوا صورته حروف بالعربي، قريت الأسم و كان اسم انا عارفه كويس، سمعته قبل كدا. شغلته و قلت اتفرج دا كان انهي منصة فرعية في مصر. اتفاجئت انها كانت في TED نفسه و المتحدثة كانت شابة عمرها ٢٨ سنة، الشابة المصرية غادة والي.



مش هتكلم عن غادة و عن اللي حققته في خلال ال٢٨ سنة، مش هتكلم عن انها اصغر متحدثة عربية هناك. مش هتكلم ان مجلة فوربس مختاراها من افضل ٣٠ شابة تحت سن ال٣٠ في اوروبا كأول فتاة عربية توصل للمكان دا. ولا انها من افضل ١٠٠ مصمم في العالم او انها من اقوى ٥٠ سيدة في مصر.

عارفين مين غادة والي؟ غادة اللي افتتحت مؤتمر شباب العالم في شرم الشيخ ٢٠١٧ و الناس هاروها انتقاد علشان عايشة برا. غادة ميكفيهاش مقال عابر عن الحلم اني اذكرها فيه، و قريب جداً هيكون في قايمتي للسيدات العرب اللي انا شايف انهم ليهم تأثير عالمي و هي طبعاً منهم. أنا هتكلم عن الحلم و الأمل.



الحلم و الأمل اللي محمد صلاح زرعهم في المصريين بنجاحاته في ليفربول و صعوده بمصر كأس العالم، الحلم و الأمل اللي فريدة عثمان بتديهم لكل رياضي عربي مش بس مصري. الحلم و الأمل اللي كتير من شبابنا بيزرعوه في الناس لما بيعرفوا يوصلو ليهم. فعلاً لما شفت أسمها و تحتيه عبارة (تم التسجيل في تيد) حسيت بفرحة و فخر و شرف كبير فعلاً مقابلهم الوحيد كان فخري بمحمد صلاح و جوائزه. اللي حصل هو إحياء للحلم في ان السن و الجنس و الديانة و الشكل و كل الحاجات دي عمرها ما هتقف قدامك لو انت محدد هدفك صح و مؤمن بيه صح. على رأي الأغنية

هيوقفوك هيحاولوا ييأسوك ويحبطوك ويكسروك خليك ديما جامد جرب حاول عاند

في كتير قوي ممكن لما الدنيا تصعب عليهم قوي يتراجعوا و ييأسوا، أو يقولوا حاولنا بس فشلنا. الحقيقي هما حاولوا اه، بس مفشلوش علشان حتجة غير انهم مكانوش فعلاً مؤمنين.

سنة ١٩٠١ يوم ٥ ديسمبر أتولد طفل لأسرة من ٧ أشخاص، أب و أم و اربع صبيان و بنت. كان بيرسم رسومات بسيطة و بيبيعها. اشتغل بعدها بياع في كشك جرايد، حلم الرسم مسابهوش و كمل عليه و اشتغل رسام في شكة انتاج، اللي بعدين سرحت كل الموظفين. جاب واحد من اللي كانوا معاه و بدأوا شركتهم. المهم فلس و اترض من بيته و فتح تاني.. اتنصب عليه و اتسرق و كمل. لغاية ما وصل و بقى اشه رسام في مجاله، و انتج افلام كتير و بقى أشهر حد في العالم كله بلا منازع، طبعاً الكلام عن صانع البهجة مؤلف و مبتكر ميكي ماوس والت ديزني.



عمرك ما هتلاقي حد فعلاً ناجح منغير قصة معافرة. و على فكرة المعافرة مش لازم التفليس و السجن مثلاً. المعافرة ممكن تكون محاربة فكر زي جاليليو، محاربة اعداء النجاح زي ستيف جوبز، محاربة ظروف زي ميسي . محاربة مستحيل زي صديقي احمد سعيد اللي كان حلمه ناسا، و وصل لأقصى مرحلة في مسابقة دولية لاختيار شخص يسافر للفضاء و كانت مفاضلة بينه و بين شخص تاني، و حلمه لسا مكمل، و برضه هتكلم عنه قريب جداً بشكل مفصل علشان العقبات الي هو عداها فعلاً تستاهل تتحكي. و طبعاً محاربة نمطية و مستحيلات زي غادة والي. رجعت للكلام عنها تاني علشان مستغرب ان ازاي مش كل شاب في مصر عارفها زي ما هما عارفين صلاح. مش بعيب عليهم، بس محتاجين نشوف شبابنا و ناسنا اللي برا مصر اللي مشرفنا دايماً و بينجحونا دايماً.





الحلم الحقيقي هو الحلم اللي حياتك بتتوقف عليه، كان في مسلسل اجنبي اسمه HOW I MET YOUR MOTHER اتقالت فيه جملة حلوة قوي. شخص بيقول للي قدامه بيسألها حلمك ايه؟ قالتله انهاء الفقر في العالم و دا كان رده

Great. Then every decision you make from here on out should be in service of that.
عظيم، يبقى كل قرا هيتاخد من هنا و رايح لازم بشكل يكون بيخدم الهدف دا.

احلمو و متخافوش، و اتمسكوا بيه للآخر، الحلم مش خيال، شكراً ليكم كلكم علشان صحيتوا فيا أنا نفسي في ان مفيش مستحيل حلم اني في يوم من الأيام اقف مكان غادة في TED و اتكلم و يكون معايا روايتي اللي بحلم اكتبها.

27 views

©2018 by Helaly Writings