٦ وشوش، يمكن أكتر



معرفش شفتوا حلقة منى الشاذلي مع مجموعة إس إن إل بالعربي ولا لأ

SNL

بس الحقيقة الحلقة دي بالنسبالي كانت نقطة مهمة و فاصلة في حاجات كتير. مش علشان فيها معلومة جديدة مثلا، لكن علشان هي بتأكد ثلاث مبائ مهمين عندي جداً.

أولاً مفيش حد معندوش مشاكل

ثانياً غالباً الضحك الكتير بيكون مخبي وراه ألم كبير

ثالثاً إن ورا كل شخص ناجح معاناة حصلت علشان يوصل للمكان دا

في آخر المقال هيكون فيديو كامل للحلقة و أنصح اللي مشافهاش أنه يتفرج عليها.

أنا إخترت عنوان المقال ٦ وشوش علشان مفيش حد فينا عنده وش واحد، يمكن شيبة لما غنى ٦ وشوش كان قصده حاجة مختلفة بس بالنسبالي كل شخص فينا جواه ال٦ وشوش و أكتر. في الوش الطيب، و في الكوميدي، الحزين،الجد، المحب، الإجتماعي، الإنطوائي، المجتهد… كتير قوي، الفكرة هي إختيارنا لمين يشوف أنهي وش من الوشوش و توقيت ظهورهم. كل واحد من اللي جايين دول كان ممكن مشاكله تعقده و تحبطه، بس هو صمد و عافر و قام. كل واحد من اللي جايين دول لو شفته في فيلم أو إعلان منغير ما يتكلم بتتضحك لوحدك، علشان هم طاقة الحب اللي جواهم جبارة، و لما اتكلموا حبيتهم اكتر علشان عرفت قصصهم أكتر.



Nancy Salah

نانسي صلاح:

نانسي هي واحدة من المفضلين ليا في المجموعة و أكترهم إضحاكاً ليا، بس مش معنى كدا اني مش بحب الباقي، أنا بموت فيهم، بس هي من الشخصيات اللي فعلاً بعزها. نانسي مأساتها أو إبتلائها زي ما هي سمته و أنا بأحييها على دا كانت إن ببساطة هي واحدة أتحرمت من مامتها طول عمرها، من سن ٣ سنوات و هي ممنوعة تشوف أو تعرف حاجة عنها بسبب الإنفصال. طيب، تقوم لما تتم ٥ سنوات تقرر إنها في يوم من الأيام هتطلع في التلفزيون و مامتها هتعرفها. صدقت في حلمها و قررت إنها هتنجح فيه، و بعد مجهود و نجاح ملوش مثيل، بعد مرض و إجهاد و إرهاق قدرت إنها توصل فعلاً و مامتها إتعرفت عليها طبعاً بمساعدة ناس بعد ٢٧ سنة، بس كانت طول الوقت (الأم) حاسة بحاجة تجاه البنت اللي بتشوفها على الشاشة دي. حلمها اتحقق باليقين.





محمود الليثي

محمود الليثي:

برده من أكتر الشخصيات اللي بتضحكني فعلاً، واحد قرر يغامر بكل حاجة علشان حلمه، عافر و تعب و إتحرم من الأكل كتير بسبب ضيق حالته المالية، بعد نجاح في الهندسة بس قرر أنه يسيب كل دا و يتمسك بحلمه. شخص اتكلم عن قد ايه كان ممكن يقعد يومين مش بياكل، يعني أيه كان بيمشي من الجيزة للأوبرا علشان حلمه. و زي ما ربنا قال :( إِنَّا لا نُضِيعُ أَجْرَ مَنْ أَحْسَنَ عَمَلا ، هو عمل كل حاجة ممكن تتعمل، رفض الإعتماد على أهله و كان مقرر خوض التجربة دي لوحده. شخص صدق في حلمه لحد ما الحلم إتحقق.





يارا فهمي

يارا فهمي :

خفة الدم اللي ملهاش مثيل، كان بيتقال عليها باردة و دمها تقيل. حصل، و تخينة و كل حاجة ممكن تتقال. اتعرضت لكل أنواع التنمر و مع ذلك صمدت في وش كل دا، حاولت و اشتغلت مليون حاجة قبل ما ربنا يستجيب ليها و تحقق حلمها. هي دلوقتي بتقول بكل فخر الكلام دا، بس أكيد في لحظات عدت عليها كانت بتكون محطمة. بس هي صمدت و عافرت و في الآخر وصلت. يارا دلوقتي الناس كلها بتشهد ليها بخفة الدم و بيحبوها، بس دا علشان هي إتعلمت تحب نفسها الأول.



توني ماهر

توني ماهر :

توني اللي كان بيعيش في اليوم هو و ليثي ب٢ جنيه، طوني اللي قعد ٩٠ يوم يومياً يروح يشوف مركز الإبداع فتح ولا لأ، و لما عرف انه فتح و هو مكنش معاهم ميأسش، راح تاني و سأل لو لسا في فرصة. توني حكاية و دليل على أهمية ان الواحد مييأسش أبداً…


في إسلام و أحمد سلطان، في ملايين غيرهم الوش اللي إحنا شايفينه مختلف تماماً عن اللي هما مخبيينه، يمكن الظاهر مرح و فرح بس اتعلمت من الحلقة دي ان مش بس المظاهر خداعة، بس المستخبي دايماً أكتر من الظاهر. أتعلمت إن الإنسان عامل زي جبل التلج، تلته بس هو اللي ظاهر.

نجوم كتير عالميين حتى لو بصيت على روبن ويليامز أكبر كوميديان في العالم اللي انتحر بسبب الإكتآب، جيم كاري و ماثيو بيري (شاندلر في فريندز)، و كتير جداً من الكوميديانات عندهم إكتآب. و دا دليل على إن كتر الضحك ميعنيش إطلاقاً راحة البال. دليل على إن كل ضحكة في الكون وراها قصة تعب و ألم. بس عندنا ولادنا في مصر بدل ما يكتئبوا صمدوا و استغلوا اللي حصلهم علشان يقويهم، صدقوا في حلمهم. مظنش عمري هتفرج عليهم منغير ما أفتكر قصصهم. نانسي هفتكر دايماً مرضها و معافرتها و انهم كانوا سبب معرفتها بوالدتها، يارا هفتكر تصديقها لحلمها، الليثي هفتكر تحمله أصعب ظروف، توني تمرده على أهله مقاب حلمه. إسلام اللي اشتغل في التخاطب علشان يساعد الأطفال علشان دي ملكته… أكيد إتعلمت منهم كتير و في كل الأحوال هفتكر إن الدنيا فيها ٦ وشوش، و يمكن أكتر.



48 views

©2018 by Helaly Writings