مش عن ٦ أكتوبر

Updated: Oct 21, 2018



في ٦٧ بعد النكسة الشعب كان مكتئب، و كان في حالة إجماع على رغبة الشعب في الخروج من الهزيمة للنصر، و في ٧٣ حصل الهدف دا و المعنويات كلها كانت في السما و الشعب كله كان ملتف على هدف واحد، مصر و النسر المصري شق السما و ضرب له سلام اعظم ملحمة و باقي الأغاني … طبعاً متخيلين ان البوست دا عن حرب أكتوبر على أساس ان النهاردة ٦ أكتوبر و كدا، لأ. هو الحقيقي أنا هدفي من ذكر أكتوبر حاجة واحدة بس. الشعب المصري اجتمع و قرر يتخطى النكسة و عملها، قرر يكسب الحرب و يكسب اسرائيل و عملها. و من قبلها قرر و خلق حضارة العالم بيتحاكى بها و قدر. في ٥٢ التفوا حول الظباط الاحرار و نجحوا تولي حكم مصر مصريين (بعيداً عن رأيي في النظام الملكي) ، و قبلها في ١٩١٩ قرروا يتجمعوا على هدف عودة سعد زغلول من المنفى. في ٥٦ ساندوا عبد الناصر في خطوة جلاء الأنجليز و في ٦٧ إعترضوا و رجعوه عن قرار تنحيه.

٢٠١١ قرروا يتجمعوا على هدف رحيل نظام عيوبه كانت أكتر من حسناته، و في ٢٠١٣ قاموا تاني على فاشية دينية. في ٢٠١٥ حققوا مستحيل تاني من مستحيلاتهم و جمعوا تكلفة قناة السويس الجديدة، و في ٢٠١٧صعدوا مصر كأس العالم. طبعاً دا غير الصورة المشرفة اللي بتصدر عن مصر بتنظيمهم للمؤتمرات الشبابية في شرم الشيخ و نجاحهم في دعم رياضات كتير و عودة الجماهير للملاعب.


مقدمة طويلة شوية؟ طيب خلوني أقول هدفي منها و من التواريخ الكتير أيه…

على مر السنين بنقول حضارة ٧٠٠٠ سنة، طب هي فين؟

الحقيقة المصريين ممكن يتكاسلوا عن أي حاجة في الدنيا، بس لما بيلاقوا هدف قومي قدامهم، مفشق قوة بتقدر تقف قدامهم علشان تحقيقه. مفيش مرة المصريين كانوا قدام هدف قومي حقيقي إلا و عرفوا يثبتوا جدارتهم. مصر دلوقتي في أخطر مرحلة من وجهة نظري، مرحلة الإنتهاء من رمي الأساسات و بداية البناء. مش حابب أتكلم سياية المرة دي و مش حابب أقول رأيي في اللي فات من أول ٥٢ لحد النهاردة. بس اللي حابب أقوله أهم أعمدة البناء في الأساسات لمصر هم:

١- التعليم

٢- الصحة

٣- الثقافة

٤- الأمن

بس…

طيب و الأقتصاد؟ حضرتك لو التعليم سليم، و الناس صحتها كويسة، و مثقفين و آمنين، هاتلي سبب واحد ميخليهمش يشتغلوا صح و يقوموا إقتصاد بلدهم صح. محتاجين مش خطة رئاسية لنهضة الأربع أعمدة دول، محتاجين مشوع قومي (معنوي معنوي أكتر منه مادي) يلم الشعب كله حواليه.


محتاجين مليون طارق شوقي، أو واحد بس يخلق هدف قومي للناس ببناء عامود التعليم للناس، يقولهم هدفي نهضة التعليم و محتاج منكم مساعدة في كذا و كذا. محتاجين المدرس يحب التدريس مش فلوسه، و الطالب يحب المادة مش درجاتها. طارق شوقي بالنسبة لي رجل المستحيل…

محتاجين وزارة صحة بتعرف تحط الصحة فوق كل شيء، محتاجين كل دكتور يشوف المريض على انه أبنه، أخوه أو أبوه. محتاجين المستشفيات يهمها نسب الشفاء أكتر من نسب الأرباح، محتاجين مستشفيات جامعية أكتر و أكتر على نموذج مستشفى سعاد كفافي، اللي همهم الأول العلاج حتى لو مش معاك فلوس، محتاجين هدف قومي ان يتم عمل المستحيل علشان صحتنا.

محتاجين الأمن و الأمان، محتاجين عودة مفهوم الشرطة في خدمة الشعب. محتاجين الشعب يفهم ان الظابط بيحميه و دا واجبه، بس حقه تسهيلنا ليه علشان يعرف يأدي واجبه. يعني تتبع تعليمات الأمن و القانون و تلتزم بيهم، و هو يتبع القاانون و نظامه و برضه يلتزم بيهم. محتاجين مشروع قومي يجمع الناس على الألتزام بالقانون، محفز مش مرهب.

محتاجين ٩٠ مليون إيناس عبد الدايم، شخصية قدرت ترجع الشباب تاني يحبوا الأوبرا و يستمتعوا بيها. يعرفوا يعني أيه ثقافة و إختلافها عن التعليم. معلش يا دكتورة سامحيني بس الحمل عليكي أكبر شوية، مطلوب منك تثقفي التربوي علشان يعرف يحقق الهدف القومي التعليمي، و تثقفي الطبيب علشان يعرف حقوقه و واجباته تجاه الشعب و الوطن. محتاجينك تثقفي الظابط علشان يعرف أهمية دوره، بس برضه ان لازم يحافظ على علاقته باللي بيحميه. و تثقفي باقي ال١٠٠ مليون…

من الآخر منغير الثقافة و التعليم و الصحة و الأمن، مفيش سياحة ولا صناعة ولا اقتصاد ولا نهضة، ولا حتى صعود لكأس عالم تاني، و بالمناسبة، كل سنة و أنتم طيبين، و علي هدف قومي متجمعين…

24 views

©2018 by Helaly Writings