ساعد تتساعد



“No good deeds goes unpunished” بالعربي يعني خيراً تعمل شراً تلقـى، و الحقيقة بقى المثلين سواء العربي أو الأنجليزي هما من أكتر الأمثال بعد عن الواقع من وجهة نظري، و عندي قناعة إن أصحاب المثلين دول هما ناس مكنش هدفهم خير، أو بمعنى أدق مكنش الخير هو هدفهم. إنما الناس اللي متعودة على العطاء، الناس اللي بطبعهم بيدوا و بيحبوا دا، عارفين كويس ان مش معنى إن الخير مجالكش من الشخص اللي أنت احسنت إليه أنه مش جاي. هو بكل بساطة ربك أعلم الخير منين أحسن، و مين يستحق ثوابه و مين بيعمل الخير لوجه الله و مين رياء للناس.  عارف إن مش دايماً دا بيكون سهل، و كل إنسان مهما كان كرمه فهو غصب عنه عند نقطة معينة بيقف و يقيم حاله. يا ترى أنا كدا صح ولا غلط؟ لحد امتى هفضل بدي و مباخدش…. بس الحقيقة بقى إن رسول الله عليه الصلاة و السلام قال ((إن لله تعالى عباداً اختصهم بحوائج الناس, يفزع الناس إليهم في حوائجهم, أولئك هم الآمنون من عذاب الله)). يعني من الأخر حسابك عند ربك، اللي انت بتعمله الحاجة و الخير في الأساس. و فكرة إن “No good deeds goes unpunished” و إن دا المقصود بيه ان اللي بيعمل خير يا إما ناس زيادة بتطلب منه حاجات يا إما بيواجه بطمع أو بنكران جميل، انا مقتنع إن الكلام دا لازم يتغير.  من “No good deeds goes unpunished” ل “No good deeds goes unnoticed” لأن الحقيقه إن ربنا بيشوف دا، و مش بيعديه، هو بيبعتلك الخير من باب تاني. يعني مثلاً تلاقي واحد لا تعرفه ولا يعرفك هو اللي بيساعدك. و برضه الحقيقه ان المساعدة مش لازم بالفعل، يعني ممكن بالدعاء، بالكلام، بأنك تسمع الناس أو يسمعوك…. مرة أنا فاكر كانت عربيتي واقفة علشان البطارية نامت، المهم الساعة كانت حوالي ٥ الفجر و كنت في البنزينة لما البطارية نامت. كنت دايماً الناس بيهاجموني اني متواجد مع اي حد منغير ما اميز انا بساعد مين، يعني اللي محتاجني انا موجود. المهم كان يومها معايا في العربية مراتي و ولادي. خلينا فكرين الساعة كانت ٥ الفجر ها، لقيت شخصين كدا في عربية كانوا بيفولوا، فا سألتهم معاكم كبل بطارية فا الولد إعتذر و خلاص قلت ماشي. في نفس الوقت كان في ولادين و ثلاث بنات راجعين من سهرة او فرح غالباً و بيجيبوا حاجة من On The Run اللي هناك، في الولاد سابوا البنات و وقفوا يحاولوا يساعدوا. الغريب بقى بالنسبالي كان صاحب عربية فراري معدي فدخل البنزينة و وقف و رفض يروح رغم ان كانت شكله تعبان لأنه لسا راجع بالعربية من الجمرك و أصر ان عربيتي قوية مش هتقومها إلا عربية قوية زيها (اللي هي عربيته) و ان كابل واحد مش كفاية لازم ٢، و رفض انه يروح لد ما عربيتي تتحرك. بعد نص ساعة تقريباً لقيت الولدين اللي سألتهم على الكابل، فاكرينهم؟ أه والله صحوا واحد تالت صاحبهم و جابوا منه الكابل و جم…. الخلاصة ان دول ٥ ولا عمري شفتهم ولا هشوفهم تاني، بس ربنا بعتهم علشان الموقف محتاج، و علشان يرد على كل حد بيشكك في أهمية انك تكون موجود للناس….. اللَّهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ حقيقي اللي بيعمل علشان مقابل عمره ما هيرضى بالمردود، و اللي بيعمل لوجه الله عمره ما يستنى مردود... ساعد علشان تتساعد

3 views

©2018 by Helaly Writings