احترم نفسك




منغير ما نحترم نفسنا ازاي عاوزين الناس تحترمنا؟ تحترم حقنا في الفرح و الحزن، حقنا في التعب و الإرهاك. حقنا في كل إحساس طبيعي أي حد بيحسوا. حب نفسك الأول قبل ما تتعلم تحب حد تاني أو حاجة تانية، و دي مش أنانية على فكرة، دي مجرد بداية لمشوار نجاح مش هيتحقق غير بيها.

خليني أقولك بسرعة اللي بيحصل لما بتحترم نفسك:

١- بتحب نفسك أكتر، و دا مش غرور أو أنانية بس بتعرف قيمتة نفسك صحها، و بالتالي مش هتسمح لوجود حد في حياتك مش بيحبك ولا بيحترمك بشكل غير اللي أنت عاوزه و حابه. مش هتسمح للعلاقات السامة انها تكون موجودة في حياتك، يعني صديق مستغل، حد سلبي طول الموقت، الناس اللي بتستنزف طاقتك و الناس الشكاية. مش هتقبل بشغل مش بتحبه، بخروجة مش عاوزها. هتعرف تمنع مصادر السلبية ليك.

٢- إحترامك لنفسك و لتعبك بيجبر الناس إنها تحترم تعبك. يعني مش منطقي مثلاً إن الناس تخاف على تعبك أكتر ما انت بتخاف على تعب نفسك، ولا أيه؟ من الآخر إحترامك لحدودك من أول تعبك و زعلك و فرحك بيجبر الناس برضه على إحترام دا عندك، فمحدش هييجي عليك، و لو حد جه هيكون بمزاجك، و لو مش حابب تعمل حاجة هترجع للنقطة اللي فاتت، انك مش هتعمل حاجة مش عاوزها.

٣- لو بتحترم نفسك فعلاً مش هيفرق معاك رأي الناس فيك، مش هتحاول تنال رضاهم و قبولهم و مش هيفرق معاك شايفينك إزاي. مش تناكة و غرور بس ببساطة علشان حبك لنفسك كافي إنك تقدر نفسك صح، و ترفض أي حد مش بيقدرك صح.

٤- الناس السلبية و الفكر السلبي عاملين زي النظارة السودة، مش بتبين للناس حقيقتك و مش بتوريك انت الصورة الحقيقية. بإحترامك لنفسك انت بتشيل الغمامة دي، بتشوف الدنيا بشكل أحسن لأنك راضي و عندك سلام داخلي، بتعرف تستمتع بكل حاجة حواليك.

٥- بإحترامك لنفسك هتكسب ثقة في انك تخرج برا دايرة الأمان و الراحة ال(Comfort Zone)، ببساطة علشان مش هتكون خايف من أي حاجة خارجها. الناس اللي معندهاش إحترام حقيقي لنفسها و لإرادتها و أحلامها، للأسف بيسمحوا لكل اللي حواليهم انهم يكون ليهم تأثير عليهم. حد كلمني بطريقة وحشة، حد أحبطني لما اتكلمت عن حلمي. كل دا بيختفي لما تكون محترم نفسك، مش بتخاف تخرج تواجه العالم، فمفيش فرص بتفوتك.

في النهاية إحترامك لنفسك هدفه الأول و الأخير هو انت، راحتك و نجاحك و سلامك الداخلي. حاولوا دايماً تشتغلوا على دا، و أكيد اللي جاي هيكون أحسن طول ما الواحد مؤمن بنفسه و محترمها.

1 view

©2018 by Helaly Writings